قلبي دليلي في اختياري الاحباب
ماهو بكيفي عندما اختار صاحب
وهو رسولي في المهمات الاصعاب
ومستشاري في جميع النوايب
هو من يحدد أصدقائي و الاحباب
ويشدني نحو الصديق المناسب
كم ناس دقوا له ورجعوا من الباب
وحاولوا له من جميع الجوانب
مايقبل الا كل نشمي ومشباب
وما يحنج الا طيبين المناقب
احسب لمن يحسب لهم قلبي احساب
واحذر من الباقي ولو هم قرايب
وأي واحد سجله قلبي اغياب
أسجله في كل الاحوال غايب
هو المأثر في علامات الاعراب
ولا يأثر فيه جازم وناصب
ولا تأثر فيه الاسماء والالقاب
ولا المصالح والرتب والمناصب
هو المحرك للخلايا والاعصاب
والقائد الأعلى لكل الكتايب
بامره يسيل الدمع من تحت الاهداب
ولجله يضيق الكون من كل جانب
إذا صفى يمطر بلا رعد وسحاب
واذا طفى تطفى جميع الكواكب
وان حس بالواحد مغالط و نصاب
ينكز ونكزني ولو كنت راغب
كم شخص ناديته بصوتي ولاجاب
ويوم ناديته بقلبي يجاوب
هو من يشاركني همومي والاتعاب
وآلام واوجاع الزمن والغلايب
حيث التقيه القى محبة وترحاب
وحيث افرقه القى فراق الحبايب
سياسته فاقت سياسات الاحزاب
وتجاربه فاقت جميع التجارب
هو الشوير اللي به الظن ماخاب
من استشاره ماطلع يوم خايب
هو ذي يفرق بين صادق و كذاب
ويعرفك بالناس مخطي وصايب
ويخبرك واين الخطورة والارهاب
ويحذرك من قبل سوء العواقب
لو تسأله وايش المسبب والاسباب
للحرب هذه والفتن بايجاوب
أنا سألته كم مسافات وهضاب
وكم ليالي باتظل الحرايب
قال المسافة بين صرواح وحباب
هي المسافة بين صنعاء ومارب
قلبي مجرب ماطلع يوم كذاب
ولي معه في العمر عدة تجارب
هو من يأكد لي اذا كنت مرتاب
ويزيل من عقلي جميع الشوايب
والقلب غير العقل في سلب وايجاب
والنور يكمن بين موجب وسالب
العقل يخطي في حسابه ولو صاب
والقلب في كل التحاليل صايب
العقل يتلخبط وينسى وهو شاب
والقلب ماينسى ولو كان شايب
العقل يتشوش من اثنين ركاب
والقلب لا داره تشد الركايب
العقل يشرد بك بوديان وشعاب
والقلب يبقى في الوظيفة مناوب
العقل في حُبه غصايب وغصّاب
والقلب مايقبل بحب الغصايب
العقل لاحبك يسوي لك اعجاب
والقلب لاحبك يجي بالعجايب
بثوا قصيدي في تويتر ووتساب
ووزعوها في جميع المكاتب
وازكى صلاتي للنبي خير الاحباب
اعداد ما قاموا علينارعينهم
