صاحب وفي يكفي
ولا مليون صاحب يختفي
لا ضاق بي ضرفي
اشوف الذيب يتحول جنبي
بسم الصحب بوفي
عسى يصفي معانا من صفي
وذي عيستكفي بوصفي
لا يضل بين الصفوف
ضيف الوفي ضيفي
وانا وافي مع الشخص الوفي
يصف في صفي
وشرف موقفي حسب الظروف
بين الحبايب
وزفي بالقوافي واهتفي
واتشرفي واعفي
وصفي بالاوالي والسيوف
قلبي دليلي في إختياري للأصحاب
ماهو بكيفي عندما أختار صاحب
وهو رسولي في المهمات الأصعاب
ومستشاري في جميع النوايب
هو من يحدد أصدقائي والأحباب
ويشدني نحو الصديق المناسب
كم ناس دقوا له ورجعوا من الباب
وحاولوا له من جميع الجوانب
ما يقبل إلا كل نشمي ومشباب
وما يحنج إلا طيبين المناقب
أحسب لمن يحسب لهم قلبي حساب
وأحذر من الباقي ولو هم قرايب
وأي واحد سجله قلبي غياب
أسجله في كل الأحوال غايب
هو المأثر في علامات الإعراب
ولا يأثر فية جازم وناصب
ولا تأثر فيه الأسماء والألقاب
ولا المصالح والرتب والمناصب
هو المحرك للخلايا والأعصاب
والقائد الأعلى لكل الكتايب
بأمره يسيل الدمع من تحت الأهداب
ولأجله يضيق الكون من كل جانب
إذا صفى يمطر بلا رعد وسحاب
وإذا طفى تطفى جميع الكواكب
وإن حس بالواحد مغالط ونصاب
ينكز ونكزني ولو كنت راغب
كم شخص ناديته بصوتي ولا جاب
ويوم ناديته بقلبي يجاوب
هو من يشاركني همومي والأتعاب
وآلام وأوجاع الزمن والغلايب
حيث التقيه القى محبة وترحاب
وحيث أفترقه القى فراق الحبايب
سياسته فاقت سياسات الأحزاب
وتجاربه فاقت جميع التجارب
هو الشوير اللي به الظن ما خاب
من إستشاره ما طلع يوم خايب
هو ذي يفرق بين صادق وكذاب
ويعرفك بالناس مخطي وصايب
ويخبرك وأين الخطورة والإرهاب
ويحذرك من قبل سوء العواقب
لو تسأله وأيش المسبب والأسباب
للحرب هذه والفتن با يجاوب
أنا سألته كم مسافات وهضاب
وكم ليالي باتظل الحرايب
قال المسافه بين صرواح وحباب
هي المسافه بين صنعاء ومأرب
قلبي مجرب ما طلع يوم كذاب
ولي معه في العمر عدة تجارب
هو من يأكد لي إذا كنت مرتاب
ويزيل من عقلي جميع الشوايب
والقلب غير العقل في سلب وإيجاب
والنور يكمن بين موجب وسالب
العقل يخطي في حسابه ولو صاب
والقلب في كل التحاليل صايب
العقل يتخلبط وينسى وهو شاب
والقلب ما ينسى ولو كان شايب
العقل يتشوش من اثنين ركاب
والقلب لا داره تشد الركايب
العقل يشرد بك بوديان وشعاب
والقلب يبقى في الوظيفه مناوب
العقل لا حبك يسوي لك إعجاب
والقلب لا حبك يجي بالعجايب
بثو قصيدي في تويتر ووتساب
ووزعوها في جميع المكاتب
